ਅਸਟਰੀਆ ਦਾ ਲੋਹੜੀ ਅਤੇ ਮਾਘੀ ਮੇਲਾ

ਰਿਪੋਰਟ: ਹਰਦੀਪ ਸਿੰਘ ਮਾਨ

12 ਜਨਵਰੀ 2002 ਨੂੰ ਅਸਟਰੀਆ ਦੀ ਰਾਜਧਾਨੀ ਵੀਆਨਾ ਵਿਚ ਪਹਿਲੀ ਬਾਰ ਬੜੀ ਧੂਮਧਾਮ ਨਾਲ ਵਿਕਾਸ ਪੰਜਾਬੀ ਸਭਿਆਚਾਰ ਸੁਸਾਇਟੀ ਵੱਲੋਂ ਲੋਹੜੀ ਅਤੇ ਮਾਘੀ ਮੇਲਾ ਮਨਾਇਆ ਗਿਆ। ਜਿਸ ਨੂੰ ਦੇਖਣ ਲਈ 400 ਦੇ ਕਰੀਬ ਦਰਸ਼ਕ ਪਹੁੰਚੇ। ਸਟੇਜ ਸੰਚਾਲਨ ਸਾਲਜ਼ਬੁਰਗ ਤੋਂ ਵਿਸ਼ੇਸ਼ ਤੌਰ ਤੇ ਪਹੁੰਚੇ ਸ਼ਾਇਰ ਸ਼ੇਖਰ ਨੇ ਕੀਤਾ। ਸਭਿਆਚਾਰਕ ਪ੍ਰੋਗਰਾਮ ਦੇ ਸ਼ੁਰੂ ਵਿਚ ਓਮ ਸ਼ਰਮਾ ਨੇ ਸ਼ਬਦ ਗਾਇਨ ਕੀਤਾ। ਉਸ ਤੋਂ ਉਪਰੰਤ ਬੱਚਿਆਂ ਨੇ ਪੰਜਾਬੀ ਗੀਤਾਂ ਉਪਰ ਨਾਚ ਕਰਕੇ ਪ੍ਰੋਗਰਾਮ ਅਗਾਂਹ ਕੀਤਾ। ‘ਕਲਾਕਾਰਾਂ ਨਾਲ ਰਾਬਤਾ’ ਮੈਗਜ਼ੀਨ ਦੇ ਮੁੱਖ ਸੰਪਾਦਕ ਅਤੇ ਵਿਕਾਸ ਪੰਜਾਬੀ ਸਭਿਆਚਾਰ ਸੁਸਾਇਟੀ ਦੇ ਪ੍ਰਤੀਨਿਧ ਜਸਵਿੰਦਰ ਸਿੰਘ ਛਿੰਦਾ ਨੇ ਸਮੂਹ ਪੰਜਾਬੀਆਂ ਨੂੰ ਲੋਹੜੀ ਅਤੇ ਮਾਘੀ ਮੇਲੇ ਦੀਆਂ ਮੁਬਾਰਕਾਂ ਦਿੱਤੀਆਂ। ਇਸ ਤੋਂ ਇਲਾਵਾ ਲੋਹੜੀ ਅਤੇ ਮਾਘੀ ਦੇ ਇਤਿਹਾਸ ਪਿਛੋਕੜ ਬਾਰੇ ਚਾਨਣਾਂ ਪਾਇਆ। ਇਸ ਦੇ ਨਾਲ ਹੀ ਪੰਜਾਬੀ ਭੰਗੜਾ ਗਰੁੱਪ ਨੇ ਸਟੇਜ ਉਪਰ ਧਮਾਲਾਂ ਪਾਈਆਂ। ਪਰੀਆਂ ਵਰਗੀਆਂ ਆਸਟਰੀਅਨ ਕੁੜੀਆਂ ਜਦੋਂ ਰਾਜਸਥਾਨੀ ਲਿਬਾਸ ਵਿਚ ਸਟੇਜ ਤੇ ਆਈਆਂ ਤਾਂ ਲੋਕਾਂ ਨੇ ਸਾਹ ਰੋਕ ਲਏ। ਸੀਸੀ, ਲੀਲੀ ਅਤੇ ਰੀਮਾਂ ਨੇ ਜਦ ਰਾਜਸਥਾਨੀ ਗੀਤ ਤੇ ਰਾਜਸਥਾਨੀ ਕੱਪੜੇ ਪਾ ਕੇ ਨਾਚ ਪੇਸ਼ ਕੀਤਾ ਤਾਂ ਸਭ ਅਸ਼ ਅਸ਼ ਕਰ ਉੱਠੇ। ਸੀਸੀ ਅਤੇ ਉਸ ਦੀਆਂ ਸਾਥਣਾਂ ਨੇ ਇਹ ਸਾਬਤ ਕਰ ਦਿੱਤਾ ਕਿ ਨਾਚ ਘੱਟ ਕੱਪੜੇ ਪਾ ਕੇ ਜਾਂ ਐਵੇਂ ਛਾਲਾਂ ਮਾਰ ਕੇ ਨਹੀਂ ਹੁੰਦਾ ਸਗੋਂ ਪੂਰੇ ਲਿਬਾਸ ਵਿਚ ਵਧੀਆ ਲਗਦਾ ਹੈ, ਜੇ ਤੁਹਾਡੇ ਕੋਲ ਕਲਾ ਹੋਵੇ। ਪਰ ਉਸ ਤੋਂ ਉਪਰੰਤ ਸਾਡੇ ਭਾਰਤੀ ਮੁੰਡੇ-ਕੁੜੀਆਂ ਵੱਲੋਂ ਪੱਛਮੀ ਢੰਗ ਨਾਲ ਨਾਚ ਪੇਸ਼ ਕੀਤਾ ਗਿਆ, ਜਿਸ ਨੇ ਸਭ ਨੂੰ ਸੋਚਣ ਲਾ ਦਿੱਤਾ। ਛੋਟੀ ਬੱਚੀ ਜਸਪ੍ਰੀਤ ਕੌਰ ਰਾਏ ਨੇ ਗੀਤ ‘ਢੋਲ ਜਗੀਰੋ ਦਾ’ ਤੇ ਕਮਾਲ ਦਾ ਭੰਗੜਾ ਪਾਇਆ। ਸਿਕੰਦਰ ਬਰਾੜ ਨੇ ਸ਼ੇਖਰ ਦੇ ਲਿਖੇ ਟੱਪੇ ਗਾ ਕੇ ਮਾਹੌਲ ਨੂੰ ਸੰਗੀਤਕ ਕੀਤਾ, ਬਹੁਤੇ ਟੱਪੇ ਪ੍ਰਵਾਸ ਨਾਲ ਸੰਬੰਧਿਤ ਹੋਣ ਕਰਕੇ ਸਰੋਤਿਆਂ ਦੇ ਮਨ ਜਜ਼ਬਾਤੀ ਹੋ ਗਏ।

 

ਇਸ ਤੋਂ ਉਪਰੰਤ ਵਿਸ਼ੇਸ਼ ਪੇਸ਼ਕਸ਼ ਪਹਿਲੀ ਬਾਰ ਆਸਟਰੀਅਨ ਜ਼ਿੰਦਗੀ ਤੇ ਆਧਾਰਿਤ ਜਸਵਿੰਦਰ ਸਿੰਘ ਛਿੰਦਾ ਦਾ ਲਿਖਿਆ ਨਾਟਕ ‘ਮਹਿਫਲ’ ਪੇਸ਼ ਕੀਤਾ ਗਿਆ। ਜਿਸ ਵਿਚ ਹਾਸਾ-ਮਜ਼ਾਕ ਕਰਕੇ ਲੋਕਾਂ ਨੂੰ ਹਸਾਇਆ ਗਿਆ ਅਤੇ ਨਾਲ ਹੀ ਅਸਟਰੀਆ ਵਿਚ ਦਰਪੇਸ਼ ਮੁਸ਼ਕਲਾਂ ਨੂੰ ਬਖ਼ੂਬੀ ਪੇਸ਼ ਕੀਤਾ ਗਿਆ। ਲੋਕਾਂ ਨੂੰ ਨਸ਼ਿਆਂ ਅਤੇ ਲੜਾਈਆਂ ਕਾਰਨ ਹੋ ਰਹੀ ਪੰਜਾਬੀ ਕਮਿਊਨਟੀ ਦੀ ਬੇਇੱਜ਼ਤੀ ਬਾਰੇ ਦੱਸਿਆ। ਇਸ ਨਾਟਕ ਵਿਚ ਕੁਲਵੰਤ ਸਿੰਘ, ਕੀਰਤਨ ਸਿੰਘ ਗਰੇਵਾਲ, ਜਸਵਿੰਦਰ ਬਿੰਦਾ, ਹਰਜਿੰਦਰ ਸਿੰਘ, ਨਰਿੰਦਰ ਚੋਪੜਾ ਅਤੇ ਰਸ਼ਪਾਲ ਸਿੰਘ ਨੇ ਆਪਣੀ ਅਦਾਕਾਰੀ ਨਾਲ ਲੋਕਾਂ ਨੂੰ ਕੀਲ ਲਿਆ। ਇੱਥੇ ਜ਼ਿਕਰ ਯੋਗ ਹੈ ਕਿ ਨਾਟਕ ਦੇ ਸਾਰੇ ਕਲਾਕਾਰ ਕੋਈ ਪੇਸ਼ਾਵਰ ਕਲਾਕਾਰ ਨਹੀਂ ਹਨ। ਸਗੋਂ ਆਮ ਇਨਸਾਨਾਂ ਵਾਂਗ ਸਾਧਾਰਣ ਕੰਮ ਕਰਦੇ ਹਨ। ਜਸਵਿੰਦਰ ਸਿੰਘ ਛਿੰਦਾ ਦੇ ਨਿਰਦੇਸ਼ਨ ਦੀ ਵੀ ਕਾਫ਼ੀ ਪ੍ਰਸੰਸਾ ਹੋਈ।

 

ਨਾਟਕ ਤੋਂ ਬਾਅਦ ਪਾਕਿਸਤਾਨੀ ਸੁਸਾਇਟੀ ਦੇ ਪ੍ਰਤੀਨਿਧ ਅਖਤਰ ਬੇਗ, ਜਿਸ ਨੂੰ ਅਤੇ ਉਸ ਦੇ ਹੋਰ ਸਾਥੀਆਂ ਨੂੰ ਵਿਸ਼ੇਸ਼ ਮਹਿਮਾਨ ਵਜੋਂ ਸੱਦਿਆ ਗਿਆ ਸੀ, ਨੇ ਸਟੇਜ ਤੇ ਦੁਆ ਕੀਤੀ ਕਿ ਸਾਡੇ ਦੋਨੇਂ ਪੰਜਾਬਾਂ ਦੀ ਏਕਤਾ ਬਰਕਰਾਰ ਰਹੇ। ਵਿਕਾਸ ਪੰਜਾਬੀ ਸਭਿਆਚਾਰ ਸੁਸਾਇਟੀ ਦੇ ਅਹੁਦੇਦਾਰ ਜਸਵਿੰਦਰ ਸੰਧੂ (ਪ੍ਰਧਾਨ), ਸੰਤੋਖ ਸਿੰਘ (ਉਪ ਪ੍ਰਧਾਨ), ਸਰਵਣ ਮੰਡੇਰ (ਸਕੱਤਰ), ਜਸਵਿੰਦਰ ਬਿੰਦਾ (ਉਪ ਸਕੱਤਰ), ਜਸਕਰਣ ਸਿੰਘ (ਖ਼ਜ਼ਾਨਚੀ), ਭਜਨ ਮੰਡੇਰ, ਕੁਲਵੰਤ ਸਿੰਘ, ਅੰਗਰੇਜ਼ ਸਿੰਘ, ਕੁਲਦੀਪ ਸਿੰਘ, ਬੰਟੀ ਅਤੇ ਹੋਰ ਮੈਂਬਰਾਂ ਨੇ ਪੂਰੀ ਤਨਦੇਹੀ ਨਾਲ ਸਾਰੇ ਪ੍ਰੋਗਰਾਮ ਦੀ ਰੇਖ-ਦੇਖ ਕੀਤੀ ਅਤੇ ਕੋਈ ਵੀ ਸ਼ਰਾਰਤ ਨਹੀਂ ਹੋਣ ਦਿੱਤੀ। ਪ੍ਰੋਗਰਾਮ ਅਤੇ ਨਾਟਕ ਦੀ ਸਫ਼ਲਤਾ ਨੂੰ ਦੇਖ ਕੇ ਕੁਝ ਸੂਝਵਾਨਾਂ ਨੇ ਵਿਸਾਖੀ ਤੇ ਵੀ ਇਹੋ ਜਿਹਾ ਸਭਿਆਚਾਰ ਪ੍ਰੋਗਰਾਮ ਕਰਵਾਉਣ ਦੀ ਮੰਗ ਕੀਤੀ।

info@jattsite.com